گوندی هەرمۆتە سەربە قەزای کۆیە لە پارێزگای هەولێر چۆڵکرا

هەولێر - AA

بەهۆی بۆردومانەکانی ئێران بۆسەر قەزای کۆیە، گوندی هەرمۆتە کە دەکەوێتە نزیک شوێنی بۆردومانەکان، چۆڵکراوە.

گوندی هەرمۆتە کە نزیکەی ١٠٠ ماڵ دەبێت و زۆرینەیان مەسیحیین، بەهۆی هەڵکەوتەی جوگرافییەوە کە نزیکە لە بارەگای پارتە کوردییە ئۆپۆزسیۆنەکانی ئێران، دانیشتووانەکەی گوندەکەیان چۆڵکردووە و بەرەو شاری کۆیە و دەوروبەری رۆیشتوون.

هاوکات لە کۆیە، دەوامی قوتابخانەکان راگیراوە و دوکان و بازاریش بە تەواوی داخراون و ترس لە دووبارەبوونەوەی بۆردمانەکان هەیە.

بەرەبەیانی ئەمڕۆ، بۆ سێیەم جار ئێران لە رێگای چوار مووشەکەوە، بارەگاکانی حزبی دیموکراتی کوردستانی ئێرانی کردە ئامانج و لە ئەنجامدا، ژمارەیەک کەس بوون بە قوربانی.

وەزارەتی تەندروستی هەرێمی کوردستان رایگەیاند کە لە ئەنجامی بۆردوومانەکەدا، هەشت کەس برینداربوون و کەسێکیش گیانی لەدەستداوە.

دوای راگەیەندراوەکەش ئاماری گیانلەدەستدان بۆ سێ کەس بەرزبووەوە.

٢٨ی ئەیلوولی ئەمساڵ ئێران لە رێگای مووشەکەوە، بارەگاکانی حزبی دیموکراتی کوردستانی ئێران لە قەزای کۆیە، بارەگاکانی کۆمەڵە لە زڕگوێز و بارەگاکانی پارتی ئازادی کوردستانی لە ناحیەی پردێ بۆردومان کرد و ژمارەیەک قوربانی لێکەوتەوە.