یەکەم زەنگی ساڵی نوێی خوێندن لە هەرێمی کوردستان لێدرا

هەولێر - AA

ئەمڕۆ سێشەممە ١٣ی ئەیلوول، زەنگی دەستپێکردنی ساڵی نوێی خوێندن لە سەرجەم قوتابخانەکانی هەرێمی کوردستان لێدرا.

لە پەیمانگای هیوای نابیستان هاوشێوەی هەموو قوتابخانەکانی هەرێمی کوردستان، کاتژمێر ٠٨:٣٠ بە ئامادەبوونی وەزیری کار و کاروباری کۆمەڵایەتی، کوێستان محەمەد زەنگی دەستپێکردنی ساڵی نوێی خوێندن لێدرا.

رێوڕەسمەکە بە سرودی ئەی رەقیب بە دەنگ و ئاماژە بۆ نابیستان دەستی پێ کرد و دواتریش وەزیری کار و کاروباری کۆمەڵایەتی لە گوتارێکیدا، ئاماژەی بە دەستپێکردنی ساڵی نوێی خوێندن کرد و دڵنیاییدا بە کەسوکاری قوتابییانی نابیست، نابینا و خاوەنپێداویستی تایبەت کە هەموو هەوڵێکیان دەخەنەگەڕ بۆ سەرکەوتنی قوتابییەکان.

وەزیری کار و کاروباری کۆمەڵایەتی، کوێستان محەمەد گوتی: "ئەمڕۆ ساڵی نوێی خوێندنمان دەست پێ کرد و بۆ ئەمساڵ ١٧١ قوتابیمان هەیە و لەلای ئێمە وەک هەر قوتابییەکی ئاسایی بەیارمەتی وەزارەتی پەروەردە، مەنهەجەکانیان بەڕێوەدەچێت، ئەوە مامۆستایانی ئێمەن کە وایانکردووە ئەو قوتابییانە لە خوێندن دانەبڕێن و بگەنە ئاستێکی بەرز".

کوێستان محەمەد گوتیشی: "دڵنیایی دەدەینە کەسوکاری قوتابییان کە هەموو تواناکانی خۆمان دەخەینە گەڕ بۆ ئەوەی ئەو قوتابییانە بەردەوام بن لە خوێندن".

دواتر وەزیری کار و کاروباری کۆمەڵایەتی کوێستان محەمەد، زەنگی دەستپێکردنی ساڵی نوێی خوێندنی لە پەیمانگاکە لێدا و بەمەش قوتابییان چوونە پۆلەکانیانەوە و پڕۆسەی پەروەردە و فێرکردن بۆ ئەمساڵ دەستی پێ کرد.

یەک ملیۆن و ٨٨٥ هەزار و ٤٠٠ قوتابی و ١٥٠ هەزار مامۆستا بەشداری پڕۆسەی ساڵی نوێی خوێندن (٢٠٢٢-٢٠٢٣) دەکەن.