Во Косово уништени околу 1.000 парчиња нелегално оружје

ФЕРИЗАЈ (АА) - Денес косовската полиција уништи околу 1.000 парчиња нелегално оружје запленето во текот на годинава, јавува Анадолу.

Заменик-министерот за внатрешни работи на Косово, Блерим Гашани, заменик-генералниот директор на косовската полиција Дејан Јанковиќ, постојаниот претставник на Косовската програма за развој на Обединетите нации (УНДП), Нуно Кејрос, како и други гости, присуствуваа на настанот што се одржа во фабрика во близина на градот Феризај во Косово.

Заменик-министерот Гашани истакна дека настанот за уништувањето на оружјето го нагласил извонредниот напредок што го направиле како општество.

Повикувајќи ги сите институции да продолжат да работат заедно за граѓаните да се чувствуваат безбедни и да живеат слободно, заменик-министерот Гашани рече:

„Уништувањето на ова нелегално оружје ја покажува нашата решителност да го елиминираме потенцијалот за насилство и да обезбедиме светла и безбедна иднина за граѓаните на Косово, без каква било дискриминација“.

Свои обраќања имаа и Јанковиќ и Кејрош, кои им честитаа на институциите и персоналот за нивниот придонес во заплената на нелегалното оружје.

По говорите започна уништувањето на околу 1.000 парчиња нелегално оружје запленето од страна на косовската полиција во различни операции оваа година.

Според истражувањето спроведено од меѓународните организации, се проценува дека косовските граѓани поседуваат повеќе од 200.000 парчиња нелегално оружје.