Франција го забранува пушењето на повеќето отворени јавни простори

СКОПЈЕ (АА) – Франција воведе забрана за пушење на повеќето отворени јавни простори, меѓу кои плажи, паркови, јавни градини, автобуските постојки, спортски објекти, како и во близина на училишта, библиотеки и базени, јавува Анадолу.

Иако првично беше планирано забраната да стапи на сила од 1 јули, таа беше активирана порано – на 29 јуни, откако официјалниот указ беше објавен во Службен весник. За прекршителите е предвидена казна од 135 евра (околу 158 долари).

Пушењето останува дозволено на јавни клупи, освен ако се наоѓаат во близина на забранети зони или се обележани со знак „Забрането пушење“.

Одлуката е дел од пошироката стратегија за јавно здравје на Франција, која вклучува зголемување на цените на тутунот, воведување на обична амбалажа и построги регулативи за електронските цигари.

Мерката следува по сличните чекори на Шпанија, која неодамна ги прошири забраните за пушење и на терасите на рестораните и универзитетските кампуси. Локалните власти ќе бидат одговорни за спроведување на новите правила.

Франција годишно бележи околу 75.000 смртни случаи како последица на тутунот, што го поттикна француското здравство да преземе посилни мерки за заштита на јавниот простор од чадот на цигарите.