СЗО предупредува: КОВИД-19 и понатаму глобална закана за здравјето

ЖЕНЕВА (АА) - Тедрос Аданом Гебрејесус, генерален директор на Светската здравствена организација (СЗО), изјави дека крајот на КОВИД-19 не треба да се гледа како престанување на глобалната здравствена закана, јавува Анадолу.

Втор ден продолжува 76. Светско здравствено собрание (ДСА), највисоко тело за одлучување на СЗО.

Потсетувајќи дека пред помалку од три недели го прогласил крајот на пандемијата на КОВИД-19 како вонредна состојба за јавното здравје од меѓународна загриженост, Гебрејесус рече:

„Тоа беше момент на олеснување и размислување. Охрабрувачки е да се види како животот се враќа во нормала - да можеш да гушнеш пријател, да патуваме и да се среќаваме слободно. Бевме заложници на овој вирус некое време, па, како што реков, тоа е олеснување.“

Сепак, тој нагласи дека тоа не значи дека КОВИД-19 престанал да биде закана за глобалното здравје.

„Опасноста од појава на друга варијанта што ќе предизвика нови бранови на болести и смрт останува. Исто така, останува заканата од појава на друг патоген со уште поголем смртоносен потенцијал“, предупреди Гебрејесус.

Нагласувајќи дека треба да постои подготвеност за решителна, колективна и фер борба во следниот епидемиски процес, Гебрејесус посочи дека епидемијата покажува дека постојат осум милијарди луѓе што треба да се заштитат во вонредни ситуации.

Укажувајќи на напредокот постигнат во рамките на универзалната здравствена покриеност, Гебрејесус рече: „Што се однесува до универзалната здравствена покриеност, постигнавме напредок и ги решивме недостатоците, а од 2018 година уште 477 милиони луѓе ги уживаат придобивките од универзалната здравствена покриеност. Но, според сегашните трендови , помалку од половина од светското население ќе биде покриено до крајот на 2030 година, што значи дека мора барем да го удвоиме темпото.“