Археолозите во западна Турција открија дел од олтар на грчката божица Деметра

УШАК (АА) - Археолозите во западна Турција открија дел од олтар на грчката божица Деметра за време на ископувањата во античкиот римски град Блаундус, јавува Агенција Анадолија (АА).

Блаундус, исто така познат како Блаундос, најпрво бил изграден од Македонците кои дошле во Анадолија, денешна Турција, по воената кампања на Александар Велики. Урнатините на античкиот град, што се наоѓа во денешниот регион Улубеј на областа Ушак, подоцна биле окупирани од Римјаните.

Зборувајќи за АА, Бирол Џан, професор по археологија на Универзитетот „Ушак“, рече дека делот од олтарот е откриен во дворот на храмот на божицата Деметра, која го симболизира земјоделството, житото и жетвата во митологијата.

„Тој има најмалку две скалила, од прилика со димензии околу 5x4 метри“, рече Џан. „Немаме многу податоци за неговата надградба.“

„Благодарение на неговите темели, ние можеме да заклучиме за неговиот план. За време на работата, беше пронајдено парче олтарна маса, за која мислиме дека се наоѓала на овој олтар“, додаде.

Олтарите, според Џан, се една од градбите со кои луѓето што доаѓале на местото за да се поклонат имале директен контакт, додавајќи дека луѓето што доаѓаат тука не влегуваат во храмот туку во дворот.

„Кога сакале да принесат жртва, тие го правеле тоа пред овој олтар. Олтарот е градба од истиот период, направен иста година како и храмот“, додаде тој.

„Храмот на Деметра бил многу почитуван во тоа време“, рече Џан, и наведе дека планираат да продолжат со работата во регионот следната година и да ја завршат реставраторската работа.

Тој исто така кажа дека тимот за време на ископувањата открил цистерни што датираат од византискиот период.