„Запрете го геноцидот“, порачаа британските Евреи во Лондон

ЛОНДОН (АА) - Десетици луѓе се собраа вчера на демонстрации во британската престолнина Лондон протестирајќи против израелските напади на Газа и во знак на сеќавање на загинатите во нападот на баптистичката болница Ал-Ахли, јавува Анадолу.

На протестот, организиран од еврејската група На'амод на Плоштадот на Парламентот, критикувана е и британската Влада поради нејзиното премолчување за тоа што се случува во Газа.

Насобраните извикуваа слогани, како „Запрете го геноцидот“, „Моментален прекин на огнот“ и „Ослободете ги заложниците“. Некои држеа транспаренти на кои пишуваше „Британските Евреи бараат слобода и еднаквост за сите Палестинци“.

Читајќи ја изјавата во името на групата, Дени, кој го наведе само своето име, рече дека ситуацијата во Газа се влошува со секој поминат час.

Осврнувајќи се на израелските воздушни напади изведени во вторникот врз баптистичката болница Ал-Ахли во Газа, тој рече дека ужасните сцени на уништување шокирале милиони низ светот.

Зборувајќи дека ја делат болката со оние што сѐ уште жалат за убиените во нападот на палестинската група Хамас на 7 октомври врз израелските градови, тој додаде дека се надева на ослободување на 200 киднапирани израелски државјани.

„Не можеме да стоиме со скрстени раце додека израелската војска, пред наши очи, се впушта во колективно казнување, убивајќи илјадници и насилно раселувајќи над еден милион палестински цивили во Газа. Ова е злосторство против човештвото“, додаде тој.

Критикувајќи ги изјавите на израелското раководство за „самоодбрана“, рече дека не разбираат „каков бил контекстот во кој бомбардирањето на цивилни цели би можело да се смета за пропорционално или неопходно“.

Тој додаде дека ниту еден Палестинец не би требало да биде поврзан со „воените злосторства на Хамас“, како што ниту недолжните израелски цивили не би требало да ја сносат одговорноста за „воените злосторства на нивната влада“.

Јасемин Ахмед, британска директорка на организацијата Хјуман Рајтс Воч (ХРВ), ги осуди нападите од 7 октомври, но додаде дека „ништо не ги оправдува воените злосторства.“

„Ништо не ги оправдува неселективните убиства. Ништо не го оправдува колективното казнување на населението што противправно е под опсада последните 17 години“, истакна таа.

Повикувајќи на почитување на меѓународните обврски, Ахмед рече дека храната, водата, горивото и сите основни потреби треба да бидат доставени во Газа.

„Можете ли да замислите вечерва да си легнете во кревет (знаејќи дека) вие и вашето семејство можеби нема да преживеете? Дури и ако сте во зграда на ОН и барате засолниште, дури и доколку сте во болница и барате засолниште, не сте безбедни во Газа“, рече директорката на ХРВ на Британија.

Таа додаде дека британскиот Парламент и Владата не сториле „ништо“ да го спречат тоа со што се соочуваат луѓето во Газа.

„Риши Сунак (премиер на Велика Британија) и Џејмс Клеверли (министер за надворешни работи), ќе останете запаметени во историјата по тоа што не станавте и не му рековте на Израел дека не може колективно да го казнува целото население. Ќе останете запаметени по своето молчење и соучесништво“, рече Ахмед.

Газа преживува тешка хуманитарна криза. Овој регион е без струја, а водата, храната, горивото и медицинските материјали се при крај.

Конфликтот во Газа, која е под израелско бомбардирање и опсада од 7 октомври, започна кога Хамас ја почна операцијата „Поплава Ал Акса“, ненадеен напад со низа лансирања на ракети и инфилтрирање во Израел преку копно, море и воздух. Хамас наведе дека операцијата е одмазда за упадите во џамијата „Ал Акса“ и зголеменото насилство од страна на еврејските доселеници врз Палестинците.

Израелската војска како одговор ја започна операцијата „Железни мечеви“ кон позициите на Хамас во Појасот Газа.

Најмалку 3.785 Палестинци загинаа во израелските напади на Газа, а во нападите на Хамас животот го загубија 1.400 Израелци.