Кинескиот премиер Ли Чијанг го пречека германскиот канцелар Мерц во Пекинг

ИСТАНБУЛ (AA) - Кинескиот премиер Ли Чијанг денес во Пекинг го пречека германскиот канцелар Фридрих Мерц, каде што разговараа за билатералната и меѓународната соработка, јавува Анадолу.

Берлин и Пекинг „се оддалечени речиси 7.500 километри. Со години сме многу среќни што успеваме да го премостиме ова растојание. За мене е многу важно да ги одржуваме и продлабочуваме нашите дипломатски и економски односи“, напиша Мерц на американската компанија за социјални медиуми Х.

„За да ја постигнеме оваа цел, потребни ни се отворени канали на дијалог“, изјави тој по средбата со Ли, при што двете страни потпишаа и неколку договори.

Денес Мерц пристигна во Пекинг во прва посета на втората по големина светска економија откако беше избран минатата година.

За време на посетата кинеското Министерство за надворешни работи ги опиша Германија и Кина како „сеопфатни стратегиски партнери“.

Портпаролката на Министерството, Мао Нинг, изјави дека Кина и Германија „имаат воспоставено успешни практики на здрава конкуренција и интегриран развој“ и дека соработката меѓу двете земји е заемно корисна и носи конкретни придобивки за народите на двете држави.

Во рамките на посетата Мерц треба да се сретне и со кинескиот претседател Си Ѓинпинг. Тој е трет западен лидер што ја посетува Кина оваа година, по посетите на канадскиот и британскиот премиер во јануари.

Претходно овој месец Мерц се сретна со кинескиот министер за надворешни работи Ванг Ји на маргините на Минхенската безбедносна конференција, а во мај минатата година оствари и телефонски разговор со претседателот Си.

Двете земји воспоставија дипломатски односи во 1972 година, а во 2014 година беа унапредени на ниво на „сеопфатно стратегиско партнерство“.

Во 2024 година Кина стана втор најголем трговски партнер на Германија на глобално ниво, при што обемот на билатералната трговска размена достигна 201,88 милијарди долари, според податоците на кинеското Министерство за надворешни работи.