Најмалку 26 цивили се убиени во воздушни напади во Мјанмар

ИСТАНБУЛ (AA) - Најмалку 26 цивили се убиени, а 19 се повредени во воздушните напади извршени од воената хунта во западниот и северозападниот дел на Мјанмар, објавија денес локалните медиуми, јавува Анадолу.

Според „Демократски глас на Бурма“, во државата Аракан убиени се 17 цивили, меѓу кои жени и деца, а 14 се повредени кога вчера биле извршени напади врз селото Јоенгу во Општина Понагјун.

Селото се наоѓа на околу 33 километри североисточно од Ситве, главен град на државата Аракан, кој во март 2024 година беше преземен од вооружената етничка група Араканска армија, која се бори против војската.

Жител на Понагјун, кој зборувал за медиумот под услов да остане анонимен, изјавил дека бројот на жртви може да се зголеми бидејќи дел од повредените се во критична состојба.

„Се обидуваме да ги утврдиме имињата на жртвите“, рече тој, додавајќи дека најмалку пет куќи биле уништени во нападите.

Во одделен напад во северозападниот регион Сагаинг убиени се деветмина цивили, меѓу кои и две деца, а петмина се повредени во, како што наведува медиумот, напад извршен со парамотор од страна на војската.

Жител на Општина Мјинму изјавил дека два парамотора фрлиле три бомби врз локацијата каде што локалното население користело уред „Старлинк“ за пристап до интернет.

Судирите меѓу етничките вооружени групи и војската на Мјанмар се интензивираа по пучот во февруари 2021 година, со кој беше соборена избраната влада предводена од Аунг Сан Су Ќи и нејзината партија Национална лига за демократија.

Преземањето на власта ја втурна земјата во повеќе од четири години вонредна состојба што официјално заврши во јули минатата година. Мјанмар одржа избори во три фази меѓу 28 декември и 25 јануари.

Според податоците на организациите за човекови права, убиени се повеќе од 6.000 лица, а речиси три милиони се раселени поради борбите меѓу воените власти и опозициските групи од пучот наваму.