Три лица загинаа откако хеликоптер се урна при известување во живо за сообраќајна несреќа со автобус во Лос Анџелес

Три лица загинаа, а едно е пренесено во болница откако синоќа хеликоптер се урна и се запали во населбата Чатсворт во Лос Анџелес, САД, соопшти противпожарната служба на Лос Анџелес (ЛАФД), јавува Анадолу.

„Четворица пациенти беа прегледани. За три лица беше утврдено дека починале на местото на несреќата. Еден пациент е пренесен во локална болница во непозната состојба“, соопшти службата.

Од ЛАФД додаваат дека истрагата ќе ја водат Националниот одбор за безбедност во транспортот (НТСБ) и Федералната управа за воздухопловство (ФАА).

Претходно, локалните медиуми објавија дека хеликоптерот, кој му припаѓа на Ен-би-си Лос Анџелес (КНБЦ-ТВ), известувал од местото на голема сообраќајна несреќа со автобус во која загинале најмалку две лица, кога се урнал.

Капетанот на ЛАФД, Бранден Силверман, пред новинарите изјави дека не сака да шпекулира дека станува збор за новинарски хеликоптер бидејќи тоа сè уште не е потврдено.

Полициската управа на Лос Анџелес (ЛАПД) потврди дека хеликоптерот не бил во нивна сопственост.

Градоначалничката на Лос Анџелес, Карен Бас, изјави дека е „целосно скршена“ поради загубата на животи во Чатсворт.

„Моето срце е со семејствата и блиските на оние што ги загубивме во трагичната сообраќајна несреќа со автобусот и падот на хеликоптерот“, напиша Бас во објава на социјалните мрежи.

Подоцна, градоначалничката соопшти дека се наоѓа на местото на несреќата во Чатсворт, каде што добива информации од ЛАФД и претставници на службите за јавна безбедност.

„Благодарна сум им на службите за итна помош што вечерва работат во исклучително тешки услови. Моите мисли се со сите погодени од овие трагедии, вклучително и со целото семејство на NBC4.“