Авганистан: Заменик-гувернерот на Кабул убиен во бомбашки напад

КАБУЛ (АА) - Во бомбашки напад во Авганистан утринава е убиен заменик-гувернерот на Кабул, Мухбулах Мухиби, јавува Агенција Анадолија (АА).

Министерството за внатрешни работи на Авганистан соопшти дека атентатот на Мухиби е извршен со активирање на експлозивна направа монтирана на неговото возило.

Во експлозијата загина и секретарот на Мухиби, а двајца телохранители се ранети.

Досега никој не презеде одговорност за нападот.

Авганистан е средиште на длабока повеќедецениска политичка и безбедносна криза, која се рефлектира во борбата за превласт меѓу талибанското движење и владините сили. Постојана закана за безбедноста претставува и терористичката организација ДЕАШ, која по поразите во Ирак и Сирија значително ги интензивира своите активности на авганистанско тло.

Нападите во Авганистан не престануваат дури ни по почетокот на мировните преговори, што делегациите на талибанските бунтовници и авганистанската Влада ги започнаа кон средината на месецот во Доха.