Азербејџанскиот претседател најостро го осуди нападот врз Амбасадата на Азербејџан во Техеран

АНКАРА (АА) - Азербејџанскиот претседател Илхам Алиев најостро го осуди и го нарече терористички чин нападот во Амбасадата на Азербејџан во Техеран, во кој загина еден чувар на Амбасадата, а двајца беа ранети, пренесува Агенција Анадолија (АА).

Алиев побара што поскоро да се истражи „терористичкиот чин“ и да се казнат терористите.

„Терористички напади врз дипломатски претставништва се неприфатливи!“, напиша тој на Твитер.

Азербејџанскиот претседател изрази длабоко сочувство до семејството и роднините на поручникот Орхан Асгаров, кој го изгуби животот додека ја штитеше Амбасадата и нејзиниот персонал.

Вооружен напаѓач утрово ја нападна Амбасадата на Азербејџан во Техеран со автоматско оружје, соопштија официјални претставници.

Инцидентот се случи околу 8:30 часот по локално време кога вооружен маж отвори оган кон чуварите на Амбасадата во северен Техеран, соопштија локални извори.

„Напаѓачот веднаш е уапсен од безбедносните сили“, изјави началникот на полицијата во Техеран, Хусеин Рахими, за медиумите на местото на нападот, потврдувајќи ја смртта на едно лице.