Американската тајна служба го предупреди тимот на Трамп да не одржува собири на отворено

ВАШИНГТОН (АА) - Американската тајна служба ги предупреди советниците на претседателскиот кандидат Доналд Трамп да престанат да одржуваат митинзи на отворено по обидот за атентат врз поранешниот претседател што се случи во американската сојузна држава Пенсилванија на 13 јули, известува Анадолу.

Претставници на Тајната служба ги предупредија советниците од кампањата на Трамп да не одржуваат големи собири на отворено од безбедносни причини, објави „Вашингтон пост“, повикувајќи се на три неименувани лица.

Се вели дека тимот на Трамп бара затворени простори како што се кошаркарските арени во кои можат да се соберат илјадници луѓе.

Засега неговиот тим во моментов не планира големи собири на отворено.

Извештајот доаѓа по неколку часа откако директорката на Тајната служба Кимберли Читл поднесе оставка по притисокот поради безбедносни пропусти за време на обидот за атентат.

Читл, која ја водеше агенцијата од септември 2022 година, ја презеде целосната одговорност за нарушувањето на безбедноста.