Adam Abu-bashal
16 Август 2024•Ажурирај: 18 Август 2024
АБУЏА (АА) – Оваа година во Нигерија, најнаселената земја во Африка, се откриени вкупно 39 случаи на мајмунски сипаници, јавува Анадолу
Џиде Идрис, директор на Центарот за контрола на болести во Нигерија (ЦКБН), за новинарите изјави дека ја следат ситуацијата во врска со случаите на мајмунски сипаници во земјата.
Тој посочи дека од почетокот на годинава во различни држави се откриени 39 случаи на мајмунски сипаници.
Истакнувајќи дека во земјата немало жртви од последиците од овој вирус, Идрис истакна дека Центарот продолжува да ги координира активностите.
Тој додаде дека Центарот размислува и за вакцинација на високоризичните групи.
„Нигерија очекува да добие десет илјади дози од вакцината Јунеос“, рече тој.
Нигериската Влада подготви здравствен формулар за меѓународните патници за да спречи ширење на вирусот.
Африканската унија прогласи вонредна состојба во јавното здравство низ целиот континент поради вирусот што брзо се шири во африканските земји.
Од друга страна, покрај Африка, Шведска вчера го пријави првиот случај со позаразна варијанта на мајмунски сипаници.
„Ова е прв случај што е дијагностициран надвор од африканскиот континент“, рече Оливија Вигзел, вршителка на должноста генерален директор на шведската Управа за јавно здравје.
Според нејзините зборови, болното лице побарало лекарска помош во реонот на Стокхолм, при што било потврдено дека е заразено со позаразна варијанта на вирусот мајмински сипаници позната како клад 1.
Податоците со кои располага Управата за јавно здравје на Шведска укажуваат дека лицето било заразено за време на престојот во Африка, каде што има епидемија на овој вирус.
Таа смета дека варијантата на мајмунски сипаници, која моментно се шири во Демократска Република Конго и на други места на африканскиот континент, е позаразна и со поголема стапка на смртност од варијантата клад 2, која беше одговорна за глобалната епидемија што започна во 2022 година.
Светската здравствена организација (СЗО) во средата ја прогласи ситуацијата со мајмунски сипаници за вонредна состојба за јавното здравје од меѓународно значење.
„Вонредната состојба за јавното здравје од меѓународно значење е највисоко ниво на тревога според меѓународното здравствено право“, рече шефот на СЗО, Тедрос Аданом Гебрејесус, на социјалната мрежа Х.
Од почетокот на 2024 година повеќе од десет африкански земји ја пријавиле болеста што се пренесува преку близок контакт, а Демократска Република Конго сочинува повеќе од 90 отсто од пријавените случаи.
Според СЗО, мајмунските сипаници предизвикуваат исипување и симптоми слични на грип.
„Во следните денови и недели СЗО ќе биде посветена на тоа да координира глобален одговор, тесно соработувајќи со секоја од погодените земји и користејќи го нашето присуство на терен за да се спречи пренесување, да се третираат заразените и да се спасат животи“, рече Гебрејесус.
