Германија: Амбулантно возило оштетено во војната во Украина изложено пред Бундестагот

БЕРЛИН (АА) – Амбулантно возило оштетено во напад во текот на војната во Украина е изложено пред зградата на Бундестагот во центарот на Берлин, јавува Анадолу.

Украински, литвански и германски активисти започнаа проект наречен „Оштетено амбулантно возило“ за да го привлечат вниманието на војната во Украина.

Во рамките на проектот, амбулантното возило оштетено во Харков беше донесено во главниот град на Германија.

Активистката Валентина Де Мар, која е меѓу организаторите на проектот, за Анадолу изјави дека амбулантното возило било искористено за евакуација на луѓето во завојуваниот регион Харков и било оштетено во напад на руските сили, а возачот бил тешко ранет.

Де Мар рече дека со ова возило, на чија шофершајбна се гледаат дупки направени од огнено оружје, сакаат да ѝ покажат на јавноста што значат војна и воени злосторства.

„Сакаме да ги информираме и претставниците на Бундестагот. Не можеме овде да ја донесеме уништената болница. Болницата во која отиде ова возило за да ги евакуира луѓето беше намерно гаѓана со касетни бомби на 12 март 2022 година“, рече Де Мар.

Таа истакна дека амбулантното возило било изложено во Киев, Вилнус и Минхен и дека ќе им го покаже и на луѓето во Хамбург и другите европски градови.

Многу парламентарци и политичари, вклучително и копретседателката на Социјалдемократската партија (СПД), Саскија Ескен, го посетија прикажаното амбулантно возило.