Berk Kutay Gökmen
17 Септември 2026•Ажурирано: 17 Септември 2026
Социјалната мрежа Снепчет е „подготвена да воведе“ временски ограничувања за тинејџерите, изјави вчера Еван Шпигел, извршен директор на матичната компанија „Снеп“, јавува Анадолу.
Во разговорот за Би-би-си во седиштето на компанијата во Калифорнија, Шпигел рече дека ограничувањето на времето што младите корисници би можеле да го минуваат на апликацијата би можело да биде „важен чекор напред за целата индустрија“.
„Тоа е нешто за што разговаравме и интерно“, рече тој, без да се обврзе на конкретен рок. Денес немам ништо повеќе да споделам“, изјави тој.
Тој ги даде изјавите откако „Мета“ повика и други компании за социјални медиуми да воведат ограничувања слични на оние што таа се согласи да ги примени во рамките на спогодбата вредна повеќе милијарди долари со американските сојузни држави.
Според спогодбата постигната во август, „Мета“ се согласи да плати 12,7 милијарди долари и да воведе стандардно ограничување од два часа дневно за тинејџерите на своите платформи, да ги исклучи известувањата за време на училишните часови и да го ограничи пристапот во текот на ноќта.
„Сметам дека тоа би било корисно во целина“, изјави Шпигел за Би-би-си. Многу внимателно ги разгледавме условите“, вели тој.
„Мета“ соопшти дека ќе воведе построги временски ограничувања и ќе плати дополнителни 5,3 милијарди долари доколку Јутјуб и ТикТок усвојат вакви мерки. Компанијата негираше дека сторила нешто незаконско како дел од спогодбата.
Минатиот месец портпарол на „Мета“ изрази надеж дека „Снеп“ ќе усвои слични мерки.
Шпигел посочи дека „Семејниот центар на Снеп“ веќе им овозможува на родителите алатки за следење на одредени аспекти од користењето на Снепчет од страна на нивните тинејџери.
„Сакаме да најдеме начин да бидеме дел од решението“, додаде тој.
Во тужбите против „Мета“, Јутјуб, ТикТок и „Снеп“, компаниите се обвинети дека му нанесуваат штета на менталното здравје на младите преку своите платформи.
„Снеп“, исто така, е обвинет дека овозможил нелегална продажба на дрога.
