Околу 7.000 деца баратели на азил се соочуваат со „системска занемареност“ во Холандија

Околу 7.000 деца баратели на азил што живеат во засолништа низ Холандија се подложени на „системска занемареност“ во услови што го загрозуваат нивниот развој, предупреди Холандскиот одбор за безбедност, пренесува Анадолу.

Наодите се резултат на над двегодишна истрага за условите за децата во установите за азил, објави денес холандскиот јавен сервис НОС.

Одборот го повика министерот за азил и миграција Барт ван ден Бринк да ги подобри условите во рок од шест месеци, опишувајќи го сегашниот систем како „нормализација на несигурноста“.

Капацитетите за итно сместување, првично воведени како привремен одговор на недостигот во редовните центри за азил, се состојат од пренаменети канцеларии, бродови, сали за настани и контејнери. Ваквите објекти сега сочинуваат околу 60% од локациите за прием на азиланти.

„Холандија падна под минималниот стандард“, рече претседателот на одборот, Крис ван Дам.

Истрагата покажа дека децата се соочуваат со висок ризик од изложеност на физичко и сексуално насилство, несоодветно однесување и злоупотреба, а во многу објекти недостасуваат доволно приватност и соодветни санитарни услови.

Некои деца биле преместени и до 10 пати во кратки периоди, со што се нарушува школувањето и се лишуваат од стабилност.

Одборот истакна дека недостигот на приватност и самостојност може да предизвика стрес, беспомошност и постојана будност, а самоповредување и самоубиствено однесување се пријавени кај некои малолетници без придружба.

Ситуацијата ја опиша како „морално неоправдана во држава управувана од владеењето на правото“ и наведе недостиг на политичка волја и административен капацитет за нејзино решавање.

Ван ден Бринк изјави дека ќе одговори на истрагата подоцна во текот на денот.