Еден загинат во израелски напад со беспилотно летало насочен врз возило во јужен Либан

АНКАРА (АА) - Најмалку едно лице е убиено кога израелски напад со беспилотно летало погоди возило во јужниот либански град Кунин во близина на Бинт Џбеил денес, објави либанската Национална новинска агенција, известува Анадолу.

Во соопштението на Центарот за итни операции за јавно здравје при Министерството за здравство на Либан, цитирано од агенцијата, властите потврдуваат дека според првичната проценка нападот резултирал со една жртва.

Израелската армија не даде коментар во врска со нападот или неговата цел

Израел започна напади врз Либан на 8 октомври 2023 година, што ескалираше во целосна војна до 23 септември 2024 година. Според официјалните податоци, во конфликтот загинаа повеќе од 4.000 луѓе, ранети се над 17.000, а раселени се речиси 1,4 милиони жители на Либан.

Израелските сили, и покрај прекинот на огнот меѓу Израел и Либан постигнат минатиот ноември, спроведуваат речиси секојдневни напади врз јужен Либан, тврдејќи дека цел им се активностите на либанската група Хезболах. Примирјето стави крај на повеќемесечното прекугранично војување меѓу Израел и Хезболах.

Либанските власти пријавија речиси 3.000 израелски прекршувања на примирјето, вклучувајќи ја и смртта на најмалку 208 лица и повреда на повеќе од 500 откако беше потпишан договорот.

Според договорот за прекин на огнот, Израел требаше целосно да се повлече од јужен Либан до 26 јануари, но рокот беше продолжен до 18 февруари откако Тел Авив одби да го почитува. Израел сè уште одржува воено присуство на пет гранични пунктови.