Ali Rezzakoğlu
18 Октомври 2022•Ажурирај: 19 Октомври 2022
АНКАРА (АА) - Министерството за надворешни работи на Израел денес го повика австралискиот амбасадор во Тел Авив поради потегот на Канбера да ја повлече својата одлука да го признае Ал Кудс (Ерусалим) за главен град на Израел, објавија израелските медиуми, пренесува Агенција Анадолија (АА).
Официјалната радио станица на израелската војска и порталот i24 ја потврдија информацијата дека австралискиот амбасадор Пол Грифитс бил поканет во Министерството за надворешни работи на Израел за да го разјасни споменатиот потег.
Израелскиот премиер Јаир Лапид рече дека „Ерусалим (Ал-Кудс) ќе остане вечен главен град на Израел“.
Велејќи дека Австралија ја донела одлуката како избрзан одговор на неточниот медиумски извештај, Лапид додаде: „Можеме само да се надеваме дека австралиската влада ќе управува со другите работи посериозно и професионално“.
Тој, исто така, истакна дека одлуката на Австралија „нема ништо да промени“.
Австралија ја повлече претходната одлука да го признае западен Ал Кудс како главен град на Израел, потврди денес австралиската министерка за надворешни работи Пени Вонг.
„Австралија е посветена на дводржавно решение во кое Израел и идната држава Палестина коегзистираат, во мир и безбедност, во меѓународно признатите граници. Денес, владата го потврди претходниот и долгогодишен став на Австралија дека прашањето за конечниот статус на Ерусалим треба да се реши како дел од какви било мировни преговори меѓу Израел и палестинскиот народ“, рече Вонг.
Во 2018 година, владата на тогашниот австралиски премиер Скот Морисон рече дека ќе го признае западен Ал-Кудс како главен град на Израел, но нема да ја премести својата амбасада од Тел Авив додека не се постигне мировен договор.
Министерката Вонг во 2018 година се изјасни против одлуката на Морисон и рече дека лабуристите „не го поддржуваат едностраното признавање на Ерусалим како главен град на Израел“, објави денес британскиот весник „Гардијан“.
Поранешниот американски претседател Доналд Трамп во 2017 година официјално го призна Ал Кудс како главен град на Израел, со што ја смени децениската политика на неутралност на САД кон светиот град.
Европските сојузници, исто така, го критикуваа овој потег, предупредувајќи дека одлуката на САД ќе ги влоши односите меѓу Палестинците и Израелците и дека ќе предизвика немири во регионот.
