Карни повика водечките сили во развојот на вештачката интелигенција да се здружат за „безбедна и ефикасна“ технологија

Канадскиот премиер Марк Карни ги повика Франција, Канада, САД и Кина да соработуваат за да се осигури дека вештачката интелигенција е безбедна и ефикасна, јавува Анадолу.

Говорејќи во неделата заедно со францускиот претседател Емануел Макрон на француската прекуморска територија Сен Пјер и Микелон, Карни ги опиша четирите земји како предводници во областа на вештачката интелигенција и ја нагласи потребата од соработка.

„Мора да ги здружиме силите за да обезбедиме соодветна регулација и да се осигуриме дека вештачката интелигенција е безбедна и ефикасна“, рече тој.

Од Кабинетот на Карни по средбата соопштија дека двајцата лидери нагласиле дека водечките земји во областа на вештачката интелигенција, меѓу кои Канада и Франција, „мора да соработуваат“.

Карни исто така ја истакна улогата на Канада како сигурен партнер во одговорниот развој на новите технологии, се наведува во официјалното соопштение.

Изјавите беа дадени за време на првата официјална посета на канадскиот премиер на Сен Пјер и Микелон, француски архипелаг во близина на атлантскиот брег на Канада.

Карни и Макрон исто така се согласија да ја продлабочат соработката во стратегиските сектори, меѓу кои одбраната, воздухопловството, вселенската инфраструктура, енергетската безбедност и новите технологии.