Merve Berker
03 Јули 2024•Ажурирај: 04 Јули 2024
АНКАРА (АА) - Францускиот претседател Емануел Макрон разговараше со израелскиот премиер Бенјамин Нетанјаху за растечките тензии со Хезболах по должината на израелско-либанската граница, соопшти француската амбасада во Тел Авив, пренесува Анадолу.
Францускиот претседател Емануел Макрон „ја повтори својата екстремна загриженост поради ескалацијата на тензиите меѓу Хезболах и Израел по должината на Сината линија“, соопшти амбасадата на платформата Х.
Макрон, како што е наведено, нагласи „апсолутна потреба да се спречи пожар што ќе им наштети и на интересите на Либан и на Израел и што ќе претставува особено опасен развој за регионалната стабилност“.
Се додава дека францускиот лидер „ја нагласил итноста сите страни брзо да тргнат кон дипломатско решение“.
Привремените сили на ОН во Либан (УНИФИЛ) „претставуваат суштински елемент на ова решение и нивната безбедност и слобода на дејствување мора да се зачуваат“, се вели во соопштението.
Макрон ја потврди поддршката на Франција за дипломатско решение за Израел и Либан според Резолуцијата 1701 на Советот за безбедност на ОН, со координација на САД, а Нетанјаху изрази благодарност.
„Во однос на Газа, претседателот на Републиката изрази противење на секоја нова израелска операција во околината на Кан Јунис и Рафа, што само ќе ја влоши и онака катастрофалната хуманитарна ситуација“, се вели во соопштението.
Нагласувајќи го приоритетот на „итно и безусловно ослободување на сите заложници“, Макрон го повика Нетанјаху да воспостави итен и траен прекин на огнот во Газа, да ги отстрани пречките на премините за хуманитарна помош и брзо да го спроведе планот за прекин на огнот во Газа.
Францускиот претседател нагласи дека трајниот мир во Газа и регионалната стабилност бараат веродостојно дводржавно решение, повикувајќи го израелскиот премиер да го олесни трансферот на приходите на палестинската управа.
Двајцата лидери разговараа и за Иран, ја поздравија неодамнешната Резолуција на Меѓународната агенција за атомска енергија (МААЕ) и ги осудија неодамнешните акции на Иран, потврдувајќи ја нивната посветеност на меѓународниот притисок, се додава во соопштението.
