ЕРУСАЛИМ (АА) - Повеќе од 9.500 израелски академици, наставници и медицински работници, како и околу 1.000 родители, вчера потпишаа петиции со кои ја повикуваат Владата во Тел Авив да обезбеди ослободување на заложниците што се држат во Појасот Газа, дури и по цена да се стави крај на војната во енклавата, јавува Анадолу.
Според весникот „Хаарец“, околу 3.500 академици потпишале петиција со која ја поддржуваат претходната иницијатива на резервистите од израелските воздухопловни сили, кои побараа враќање на заложниците и прекин на војната.
„Ние, членовите на академскиот кадар од високообразовните институции, се приклучуваме на повикот на воздухопловните сили и бараме итно враќање на заложниците, дури и ако тоа бара веднаш да се запре војната“, се наведува во петицијата.
Академиците предупредуваат дека „војната главно служи за политички и лични интереси. Нејзиното продолжување ќе доведе до смрт на заложници, војници и невини цивили и ќе ги исцрпи резервните сили“.
Тие додаваат дека „како што се покажало во минатото, само преговаран договор може да гарантира безбедно враќање на киднапираните лица во Израел“.
Во слична петиција, повеќе од 3.000 наставници истакнале дека „ова не е повик за одбивање на воената служба, туку апел за спасување животи“, јавува „Хаарец“.
Околу 1.000 родители, пак, потпишаа одделно писмо во кое нагласуваат: „За иднината на нашите деца, одбиваме да ги воспитуваме во бескрајна војна и нема да останеме неми пред убиствата на деца.“
„Го отфрламе опасното мислење дека во Газа нема невини. Одбиваме да ги напуштиме заложниците и да ги дехуманизираме другите народи“, наведуваат родителите.
Во меѓувреме, речиси 3.000 израелски медицински професионалци, меѓу кои и тројца добитници на Нобеловата награда, потпишале друга петиција со која ја повикуваат Владата да ги ослободи заложниците со запирање на тековната војна, пренесе „Једиот ахронот“.
Според Армиското радио, околу 150 поранешни израелски војници од елитната пешадиска единица „Бригада Голани“ исто така потпишале петиција во која бараат од Владата ставање крај на војната за да се ослободат заложниците.
Поранешниот израелски премиер Ехуд Барак и поранешниот началник на Генералштабот, Дан Халуц, исто така, потпишаа петиција потпишана од 1.525 војници од оклопните единици, повикувајќи на ослободување на заложниците, дури и ако тоа значи прекин на војната.
Истиот ден, според „Једиот ахронот“, над 1.600 ветерани од падобранските и пешадиските бригади потпишале писмо со слично барање - итно ослободување на сите заложници, дури и по цена на прекин на борбите.
Околу 170 поранешни припадници на армиската академија „Талпиот“ испратија писмо со барање за ослободување на заложниците преку завршување на војната, притоа нагласувајќи дека нивниот повик не е повик за одбивање служба.
Тие во писмото ја критикуваат политиката на израелската Влада, истакнувајќи дека „војната не служи за постигнување на безбедносните цели, туку за политички и лични интереси“ и предупредуваат дека продолжувањето на конфликтот ќе донесе само повеќе смртни случаи меѓу заложниците, војниците и невините цивили.
„Продолжувањето на војната не придонесува за ниту една од нејзините наведени цели“, се вели во писмото, предупредувајќи дека продолжувањето на војната само ќе доведе до повеќе смртни случаи, вклучувајќи заробеници, армиски војници и невини цивили.
Овие петиции се дел од поширокиот бран јавни апели од сегашни и поранешни израелски воени лица, кои бараат итно враќање на заложниците и ставање крај на војната.
Од четвртокот досега, израелските војници потпишале речиси 10 петиции со барање за крај на војната во Газа.
Премиерот Бенјамин Нетанјаху порача дека ќе ги отпушти активните војници кои ќе потпишат вакви петиции.
Израелската Армија ја обнови офанзивата врз Газа на 18 март, и покрај примирјето и договорот за размена на затвореници постигнат на 19 јануари.
Од октомври 2023 година, во израелската офанзива врз Газа се убиени речиси 51.000 Палестинци, од кои повеќето се жени и деца.
Во ноември минатата година, Меѓународниот кривичен суд издаде налози за апсење на Нетанјаху и поранешниот министер за одбрана Јоав Галант поради воени злосторства и злосторства против човештвото во Газа.
Во исто време, Израел се соочува и со тужба за геноцид пред Меѓународниот суд на правдата поради својата војна против Појасот Газа.
