Повеќе загинати и повредени при пукање во имиграциски центар во Тексас

ИСТАНБУЛ (АА) - Неколку лица се убиени и повредени утринава во вооружен напад во објект на американската Служба за имиграција и царина (ИЦЕ) во Далас, објавија властите и локалните медиуми, пренесува Анадолу.

Полицијата реагирала на инцидентот во притворниот центар на ИЦЕ во близина на автопатот „Интерстејт 35Е“ малку пред 7 часот изутрина (12:00 часот по гринич), објави телевизијата ВФАА, повикувајќи се на полициски извори.

Американската секретарка за внатрешна безбедност, Кристи Ноем, на платформата на американската компанија за социјални медиуми Х, потврди дека „има повеќе жртви и повредени“ и дека деталите сè уште се утврдуваат.

Најмалку три лица се во критична состојба, а напаѓачот бил пронајден мртов на покривот на канцеларија на адвокат за имиграција во близина, јави ВФАА.

Ноем изјави дека „напаѓачот извршил самоубиство со огнено оружје“ и дека засега не е позната причината за нападот.

Властите проверуваат дали имало и други напаѓачи, но засега тоа не е потврдено.

Повеќе детали за жртвите не беа веднаш достапни.

- Поагресивно спроведување на имиграциските закони

Нападот се случува во период кога администрацијата на претседателот Доналд Трамп значително ги интензивираше операциите на ИЦЕ од неговото инаугурирање во јануари.

Министерството за внатрешна безбедност во вторникот објави дека од 20 јануари повеќе од 2 милиони имигранти без документи ја напуштиле земјата, вклучувајќи околу 1,6 милиони доброволни заминувања и повеќе од 400.000 депортации.

Иако властите тврдат дека цел се лица со криминално досие, адвокатите за имиграција тврдат дека ИЦЕ сè почесто приведува и долгогодишни жители без документи, кои имаат семејства и работа во САД.

Тие алармираат и за случаи на незаконски приведувања од страна на агенти кои носат маски и одбиваат да се идентификуваат.