САД: Неутрализиран напаѓачот кој уби две лица во црква

ВАЈТ СЕТЛМЕНТ

Во пукотница до која дојде во тек на црковна миса во Тексас убиени се двајца верници и напаѓачот, пренесува Агенција Анадолија (АА).

Полицијата соопшти дека до вооружената престрелка дошло во предградието на градот Форт Ворт. Напаѓачот извадил оружје и почнал да пука во насобраните верници.

Откако почнал да пука, напаѓачот е погоден од еден од двајцата чувари на црквата.

Сѐ уште не е познат мотивот за нападот кој траел 6 секунди.

„Овој тим бргу одговори и за 6 секунди пукотницата беше готова. Двајцата чувари од тимот за обезбедување, кои беа волонтери, употребија оружје и го запреа убиецот, спасувајќи голем број животи“, изјави потполковникот Ден Патрик.

Властите информираа дека во моментот на нападот во црквата „Вест Фривеј“ се наоѓале околу 240 луѓе.