Руското разузнавање ја обвинува Франција дека бара начини да се вклучи во конфликтот во Украина

МОСКВА (АА) - Руската служба за надворешно разузнавање (СВР) денес ја обвини Франција дека бара пат да влезе во украинскиот конфликт на страната на Киев, јавува Анадолу.

Прес-службата на СВР соопшти дека на 31 октомври француската Влада усвоила нов закон со кој се дозволува користење на приватни воени компании за помош на „трета земја во ситуација на вооружен конфликт“.

Прес-службата забележа дека „дури и неискусен европски лаик нема сомнение за која земја се мисли“.

„Мобилните групи за воздушна одбрана и малкуте авиони Ф-16 што ѝ се на располагање на Украина не се во можност да пресретнат руски воздушни цели. Совладувањето на 'миражите' и другата опрема бара време и високи квалификации. Затоа на Киев ќе му бидат потребни странски ПВО опремени со модерно западно, првенствено француско, оружје“, соопшти СВР.

Разузнавачката служба го предупреди Париз да не верува дека овој потег го ослободува од одговорност.

„Присуството на француските приватни воени компании во Украина, скромно именувани во гореспоменатиот декрет како 'референтни оператори' на Министерството за вооружени сили, ќе се смета од Москва како директно учество на Франција во непријателствата против Русија. Како резултат на тоа, француските приватни воени компании ќе станат примарна легитимна цел на руските вооружени сили“, се наведува од СВР.