САД: Федерален судија нареди ослободување на турската докторантка Румејса Озтурк со кауција

ВАШИНГТОН (АА) - Федерален судија во американската сојузна држава Вермонт денес нареди ослободување на турската докторантка Румејса Озтурк, која беше контроверзно приведена од агенти за имиграција кон крајот на март, со кауција, јавува Анадолу.

„Судот утврди дека таа не претставува опасност за заедницата ниту, пак, има ризик од бегство. Судот им наредува на властите веднаш да ја ослободат Озтурк од притвор“, рече судијата Вилијам К. Сешнс.

Судијата додаде дека Озтурк е слободна да се врати во својот дом во Масачусетс.

„Таа, исто така, е слободна да патува во Масачусетс и Вермонт како што смета за соодветно и нема да ѝ ставам ограничувања за патување бидејќи, искрено, не сметам дека не претставува никаков ризик од бегство“, рече тој.

Румејса Озтурк, докторантка на Универзитетот Тафтс, на судското рочиште во Бурлингтон, Вермонт, присуствуваше онлајн, по повеќе од шест недели откако е уапсена на 25 март од страна на агентите на Службата за имиграција и царина (ICE) во Масачусетс поради коавторство на колумна минатата година за израелско-палестинскиот конфликт во студентскиот весник на факултетот.

Рочиштето се одржа откако Вториот окружен апелационен суд претходно оваа недела нареди Озтурк да биде пренесена од имиграцискиот затвор во државата Луизијана во федералниот окружен суд во Вермонт.