Самитот на Шангајската организација за соработка започна во киргистанскиот главен град Бишкек

Во киргистанскиот главен град Бишкек денес започна состанокот на Советот на шефови на држави на Шангајската организација за соработка (ШОС), евроазиски блок, јавува Анадолу.

Киргистанскиот претседател Садир Жапаров ги пречека шефовите на држави и влади во комплексот „Интимак Ордо“, каде што се одржува состанокот, по што лидерите направија заедничка фотографија.

Во своето обраќање на отворањето, Жапаров истакна дека состанокот се одржува во годината кога блокот одбележува 25 години од основањето, додавајќи дека овогодишната тема е „Заедно за одржлив мир, развој и просперитет“.

Тој рече дека организацијата прераснала од механизам фокусиран на безбедноста на границите во глобален актер со влијание на меѓународната сцена.

Претседателот истакна дека земјите членки сочинуваат повеќе од 40 отсто од светското население и околу една четвртина од глобалниот бруто-домашен производ (БДП).

Жапаров рече дека филозофијата врз која се темели претседавањето на Киргистан со организацијата е заснована на изреката „Единството е темел на просперитетот“, за која истакна дека ја одразува суштината на Шангајскиот дух.

Изразувајќи уверување дека земјите членки преку координирани решенија ќе започнат нова фаза во развојот на организацијата, Жапаров официјално го прогласи за отворен состанокот на Советот на шефови на држави на ШОС.

Состанокот продолжи зад затворени врати, а лидерите се очекува да ја потпишат Декларација Бишкек, со која ќе биде одбележана 25-годишнината на организацијата.

Меѓу учесниците се кинескиот претседател Си Ѓинпинг, рускиот претседател Владимир Путин, пакистанскиот премиер Шехбаз Шариф, индискиот премиер Нарендра Моди, иранскиот претседател Масуд Пезешкијан, белорускиот претседател Александар Лукашенко, казахстанскиот претседател Касим-Жомарт Токаев, таџикистанскиот претседател Емомали Рахмон и узбекистанскиот претседател Шавкат Мирзојев.

По состанокот на Советот на шефови на држави, ќе започне состанокот „ШОС Плус“, на кој се очекува да присуствува и турскиот претседател Реџеп Таип Ердоган.

Турција не е полноправна членка на блокот, но од 2012 година има статус на „партнер во дијалог“ со организацијата.