Твитер го тужи Илон Маск по раскинувањето на договорот вреден 44 милијарди долари

ВАШИНГТОН (АА) - Твитер го тужеше милијардерот Илон Маск вчера во обид да го принуди да го заврши купувањето на компанијата за социјални медиуми, јавува Агенција Анадолија (АА).

Правната постапка во судот во Делавер (САД) се случи неколку дена откако извршниот директор на „Тесла“ објави дека го раскинува договорот вреден 44 милијарди долари за купување на гигантот за микроблогирање.

„Правејќи јавен спектакл за да го стави Твитер во игра, предложувајќи и потоа потпишувајќи договор за пријателско спојување, Маск очигледно верува дека тој - за разлика од секоја друга страна која е предмет на Законот за договори во Делавер - може да го промени мислењето, да ја критикува компанијата, да го попречува нејзиното работење, да ја уништи вредноста на акционерите и да си замине“, вели Твитер во својата тужба.

„Твитер го прави ова за да го оттргне Маск од дополнителни прекршувања, да го принуди да ги исполни своите законски обврски и да го реализира договорот по исполнување на неколкуте отворени услови“, се вели во тужбата.

Компанијата бара од судот да му наложи на Маск да го заврши договорот за спојување според договорените 54,20 долари за акција на Твитер.

Маск се повлече од договорот доцна во петокот поради повеќе причини, вклучително и тоа дека Твитер не го прикажува точниот број на спам профили.

Тој во своето писмо од петокот, за раскинувањето на договорот наведе дека Твитер погрешно ги претставил податоците на корисниците, тврдејќи дека бројот на спам-ботовите на платформата за социјални медиуми е многу поголем отколку што компанијата прикажала.

Твитер го негира тврдењето, истакнувајќи дека бројот на спам-ботови е далеку под 5 проценти од вкупниот дневен број корисници.