Ahmet Gençtürk
11 Март 2023•Ажурирај: 12 Март 2023
Шведска започна истрага против екстремно десничарскиот дански политичар Расмус Палудан, познат по неговите провокации со палење примероци од светата книга Куранот, објавија медиумите, пренесува Анадолу.
Палудан, наводно, поттикнал „група луѓе“ со својата провокација минатиот април, објави весникот „Експресен“, истакнувајќи дека истрагата доаѓа речиси една година по инцидентот.
Според веста, надлежниот обвинител Адриен Комбиер-Хог рекол дека поради технички причини била потребна речиси една година за да се започне истрагата.
Палудан за весникот „Дагенс нихетер“ изјави дека нема да оди во Шведска да биде испрашуван поради безбедносни причини.
Весникот, сепак, истакна дека шведската полиција има детален план за тоа како безбедно да се спроведе сослушувањето.
Неодамна, Палудан, кој е лидер на екстремно десничарската партија Страм курс (Тврда линија), запали копија од Куранот пред турската Амбасада во Стокхолм на 21 јануари со полициска заштита и дозвола од шведските власти.
Една недела по овој случај, тој запали копија од светата книга на исламот пред џамија во Данска и рече дека ќе го повторува чинот секој петок додека Шведска не биде вклучена во НАТО.
Провокациите на Палудан, дозволени од шведските власти, предизвикаа вознемиреност кај турската и светската муслиманска јавност.
