Шведска и Холандија бараат суспендирање на трговијата на ЕУ со Израел поради „екстремно вознемирувачката“ криза во Газа

ЛОНДОН (АА) - Шведска и Холандија денес заеднички ја повикаа Европската Унија (ЕУ) да ја прекине трговијата со Израел поради „екстремно вознемирувачката и неподнослива“ хуманитарна ситуација во Газа и плановите на Израел за нови населби на Западниот Брег, пренесува Анадолу.

Во заедничко писмо до шефицата за надворешна политика на ЕУ, Каја Калас, двете земји го обвинија Израел дека не го спроведува договорот од јули со ЕУ за зголемување на хуманитарната помош за Газа, пренесува ирскиот радиодифузер „РТЕ њуз“.

Договорот од јули, постигнат меѓу Калас и израелскиот министер за надворешни работи, Гидеон Саар, претходно спречи низа можни санкции против Тел Авив, вклучително и суспендирање на трговскиот дел од Договорот за асоцијација меѓу ЕУ и Израел.

Во своето писмо, холандскиот и шведскиот министер за надворешни работи истакнаа дека сега „го поддржуваат суспендирањето на трговското поглавје од Договорот за асоцијација меѓу ЕУ и Израел и ја повикуваат (Европската) Комисијата да достави предлог за таа цел“.

Министрите, исто така, повикаа на насочени санкции против „екстремистичките израелски министри кои промовираат нелегални активности за населување и активно работат против договореното дводржавно решение“.

Тие дополнително ја повикаа Калас да достави писмена анализа за усогласеноста на ЕУ со советодавното мислење на Меѓународниот суд на правдата од 2024 година за израелската окупација на палестинските територии.

Во писмото се нагласува и улогата на Хамас, наведувајќи дека групата „носи голема одговорност за катастрофалната ситуација“ во Газа и повикувајќи ја да се откаже од власта, да се разоружа и да ги ослободи преостанатите израелски заложници.

Двајцата министри го опишаа одобрувањето на Планот за изградба Е1 од страна на израелскиот Висок совет за планирање, како „неприфатливо и јасно кршење на меѓународното право“, бидејќи договорот би ги проширил еврејските населби на Западниот Брег и сериозно би го нарушил континуитетот на која било идна палестинска држава.

Израел уби речиси 63.000 Палестинци во Газа од октомври 2023 година. Воената кампања ја опустоши енклавата, која се соочува со глад.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејства во енклавата.