Atila Altuntaş
22 Февруари 2024•Ажурирај: 23 Февруари 2024
СТОКХОЛМ (АА) - АТИЛА АЛТУНТАШ -
Директорката на Разузнавачката служба на Шведска, Шарлот фон Есен, истакна дека сакаат да ги спречат активностите на терористичката организација ПКК, која ја користи Шведска како база, и дека преземаат мерки во оваа насока, јавува Анадолу.
Фон Есен во изјава за новинарот на Анадолу ја истакна важноста да се има соработка со различни земји кога станува збор за тероризмот.
Таа рече дека во последните денови презеле остри мерки во рамки на борбата против тероризмот, и дека во овие рамки вршат добра соработка со Туркије.
„Во евалуацијата што ја направивме за оваа година, ќе продолжиме ПКК да ја категоризираме како терористичка организација. Преземаме низа различни мерки за да го стесниме опсегот на терористичката организација. Имаме желба да ги намалиме и спречиме активностите и различните актери на ПКК, која ја користи Шведска како база“, додаде таа.
- Русија, Кина и Иран се закана за Шведска -
Фон Есен истакна дека Русија, Кина и Иран претставуваат закана за безбедноста на Шведска.
„Разузнавачките активности предизвикани од овие земји претставуваат голема закана за безбедноста на Шведска“, рече Фон Есен.
Според неа, нивото на национална закана од тероризам во Шведска на 17 август било подигнато од 3. на 4. ниво.
„Постојано ја следиме ситуацијата за да го намалиме нивото на терористичката закана. Нивото на терористички аларм уште извесно време ќе стои на 4, од вкупно 5 нивоа“, додаде таа.
- „ПКК ќе продолжи да ги користи Европа и Шведска како база“ -
Разузнавачката служба на Шведска, Воената и безбедносната служба на Шведска (МУСТ) и Националната радио-одбранбена служба на Шведска (ФРА) на 13 февруари го објавија извештајот подготвен за терористичките закани кон Шведска во периодот од 2023 до 2024 година.
Во извештајот се наведени активностите на терористичката организација ПКК.
„ПКК, која поседува редовен паричен фонд во Европа и најверојатно секоја година собира милиони шведски круни, преку мрежите на своите поддржувачи во Европа и преку политичко лобирање, користејќи ги и меѓународните можности, ќе продолжи да влијае врз политиката. ПКК ќе продолжи да ги користи Европа и Шведска како база за своите терористички активности во Туркије. ПКК најверојатно ќе продолжи со своите активности и во 2024 година со цел да изгради позитивен имиџ и со цел да регрутира припадници во организацијата“, се вели во овој извештај.
