Diyar Güldoğan
24 Мај 2023•Ажурирај: 26 Мај 2023
АНКАРА (АА) - Директорот на Одделот за комуникации при турското Претседателство, Фахретин Алтун, истакна дека Туркије решително ќе се бори против терористичките организации, вклучително и против ПКК, ДАЕШ и ФЕТО, јавува Анадолу.
„Туркије се соочи со многу закани кои се насочени кон нејзината национална безбедност, стабилност и демократија“, рече Фахретин Алтун на панелот „Големата визија на Туркије“ што се одржа во турскиот главен град Анкара.
„Додека ги елиминираме заканите насочени кон нашата земја дома и во странство, ние ја продолжуваме нашата борба против терористичките организации како што се ПКК и нејзиниот сириски огранок ПЈД-ЈПГ, ДАЕШ и ФЕТО. Туркије никогаш нема да направи компромис во борбата против тероризмот“, нагласи Алтун.
Според него, и покрај тоа што ја обезбедува својата национална безбедност, Туркије, исто така, придонесе за регионалната и глобалната стабилност благодарение на решителната борба против тероризмот.
„Ние ја демонстрираме оваа стабилизирачка моќ во многу регионални и глобални прашања, особено во руско-украинската војна“, рече Алтун, додавајќи дека Туркије никогаш нема да го компромитира својот цврст став пред предизвиците.
Осврнувајќи се на односите со туркискиот свет, Алтун истакна дека неговата земја не размислува за иднина одвоена од туркискиот свет со кој споделува заедничка историја и култура.
„Како туркиски држави, видовме дека соработката и солидарноста што ја покажуваме меѓу себе не само што нè прават посилни, туку придонесуваат и за развивање заеднички отпор против предизвиците со кои се соочуваме на регионално и на глобално ниво“, нагласи тој.
Според Алтун, денешните услови, регионалните и глобалните прашања потсетуваат на важноста од заштитата на братството.
Алтун рече дека Туркије ја продлабочила соработката и партнерството со туркиските држави во различни области, вклучувајќи ги економијата, енергетиката, културата, уметноста, одбраната и транспортот.
„Заедно ќе го носиме напред нашиот идентитет, култура и вредности кои нè прават тоа што сме“, додаде Фахретин Алтун.
