ژمارەی پەنابەرانی ئۆکراینا لە پۆڵەندا نۆ ملیۆنی تێپەڕاندووە

وارسۆ - AA

تا ١٠ی کانوونی دووەمی ئەمساڵ، ژمارەی ئەو پەنابەرانەی لە ئۆکرایناوە روویان لە پۆڵەندا کردووە، نۆ ملیۆن کەسی تێپەڕاندووە.

پاسەوانانی سنووری پۆڵەندا لە هەژماری تویتەر بڵاوی کردەوە کە لە دەستپێکی جەنگی ئۆکراینا-رووسیاوە تا ئێستا، شەپۆلێکی چڕی کۆچ روویداوە.

لە تویتەکەدا باس لەوە کراوە کە تەنها دوێنێ لە ئۆکرایناوە، ٢٩ هەزار و ٩٠٠ کەس روویان لە پۆڵەندا کردووە و هاتووە: ''لە دەستپێکی جەنگەکەوە تا ئێستا، ژمارەی ئەو پەنابەرانەی لە ئۆکرایناوە هاتوونەوە پۆڵەندا گەیشتووەتە نۆ ملیۆن و ٧٤ هەزار کەس''.

بەپێی ئەو داتایانەی خراونەتەڕوو، ژمارەی ئەو هاووڵاتییە ئۆکراینیانەی پۆڵەندایان جێهێشتووە، گەیشتووەتە حەوت ملیۆن و ٢٥٠ هەزار کەس.