بافڵ تاڵەبانی: ''کاندیدی ئێمە بۆ پۆستی سەرکۆماری عێراق، دکتۆر بەرھەم ساڵحە''

سلێمانی-AA

ھاوسەرۆکی یەکێتیی نیشتمانیی کوردستان، بافڵ تاڵەبانی و ھاوسەرەکەی لە بنکەی رەوشەن بەدرخان لە سلێمانی دەنگیان دا.

پێشنیوەڕۆی ئەمڕۆ ١٠ی تشرینی یەکەمی ٢٠٢١، ھاوسەرۆکی یەکێتیی نیشتمانیی کوردستان، بافڵ تاڵەبانی و ھاوسەرەکەی، لاڤە حیکمەت گەیشتنە خوێندنگەی رەوشەن بەدرخان لە گەڕەکی مامۆستایان لە شاری سلێمانی و بەشدارییان کرد لە پرۆسەی دەنگدان لە بنکەکەدا.

سەرەتا لاڤە حیکمەت ھاوسەری بافڵ تاڵەبانی لە وێستگەی پێنج دەنگی دا و دواتر ھاوسەرۆکی یەکێتی لە وێستگەی یەک دەنگی دا.

لەکاتی ھاتنە دەرەوەی لە بنکەی دەنگدان، بافڵ تاڵەبانی خۆی لە کۆنگرەی رۆژنامەوانی و یان لێدوان بۆ میدیاکاران پاراست و تەنیا لە لێدوانێکی کورتی دا بە رۆژنامەنووسان راگەیاند، کە "یەکێتی و ھەرێمی کوردستان دەکەنەوە بە یەکێتی و کوردستانەکەی سەردەمی مام جەلال".

بافڵ تاڵەبانی گوتیشی: "کاندیدی ئێمە بۆ پۆستی سەرکۆماری عێراق، دکتۆر بەرھەم ساڵح-ە".