به‌رده‌وامیی خوێندن له‌ ئاواره‌ییدا

مووسل - AA

وه‌زاره‌تی په‌روه‌رده‌ی عێراق به‌شێك له‌ كتێب و پێویستییه‌كانی بۆ قوتابییان دابینكردووه‌، به‌ڵام هێشتا پێویستییان به‌ یارمه‌تی و به‌ كتێب و تێنووسی زیاتر هه‌یه‌.

له‌ نێو كه‌مپی حه‌سه‌ن شام كه‌ نزیك به‌ 75 كیلۆمه‌تر له‌ سه‌نته‌ری شاری هه‌ولێره‌وه‌ دووره‌ و ده‌كه‌وێته‌ نێوان شاری هه‌ولێر و مووسڵ پڕۆسه‌ی خوێندنی ئاواره‌كانی پارێزگای نه‌ینه‌وا له‌م كه‌مپه‌ به‌رده‌وامیی هه‌یه‌، قوتابخانه‌ی نه‌ینه‌وا قوتابخانه‌یه‌كه‌ پۆله‌كانی له‌و خێوه‌تانه‌ن كه‌ رێكخراوه‌ خێرخوازییه‌كان دابه‌شییان كردوون.

له‌م قوتابخانه‌یه‌ نزیك به‌ هه‌زار و 400 قوتابی له‌ سێ ده‌وامی جیاجیادا ده‌خوێنن، دوو له‌ قوتابخانه‌یان پۆله‌ سه‌ره‌تاییه‌كانن و ئه‌وی دیكه‌شیان ناوه‌ندییه‌.

كه‌مپی حه‌سه‌ن شام بۆ ئاواره‌كانی پارێزگای نه‌ینه‌وا دروستكراوه‌، نزیك به‌ هه‌زار و 500 خێزانی تێدا نیشته‌جێیه‌، زۆرینه‌ی هه‌ره‌ زۆری ئاواره‌كانیش به‌هۆی به‌جێهێشتنی ماڵ و حاڵی خۆیان و بێ كاری و نه‌بوونی ئیش كه‌مده‌رامەتن له‌رووی داراییه‌وه‌، به‌ زۆرینه‌ش پشتییان به‌ یارمه‌تییه‌كان به‌ستووه‌.

له‌م قوتابخانه‌یه‌ی له‌م كه‌مپه‌دا هه‌یه‌ نه‌ یه‌كپۆشی هه‌یه‌ و نه‌ شتی له‌و بابه‌ته‌، ئه‌و كه‌مده‌رامه‌تییه‌ی باڵی به‌سه‌ر ئاواره‌كاندا كێشاوه‌ وای لێكردوون به‌ جلی جۆراوجۆر و ره‌نگاو ره‌نگه‌وه‌ درێژه‌ به‌ خوێندنی خۆیان بده‌ن، مامۆستاكانیش له‌وانه‌ن كه‌ له‌ كه‌مپه‌كه‌دا نیشته‌جێن، ئه‌وان باس له‌وه‌ ده‌كه‌ن كه‌ هه‌رچۆنێك بێت خوێندن و به‌رده‌وامیدانی له‌ نه‌خوێنده‌واری باشتره‌.