Приведени осомничени за нападот на пратеникот Села во Собранието

СКОПЈЕ (АА) - Денеска во Скопје во полициска станица се приведени две лица под сомнение дека го нападнале пратеникот Зијадин Зела во Собранието на Република Македонија за време на насилствата и нередите на 27 април, пренесува Anadolu Agency (AA).

Според соопштението на Министерството за внатрешни работи на Република Македонија (МВР), лицето К.Ѓ. (39) од Скопје и неговиот татко Ц.Ѓ. (68) утрово се приведени во полициската станица Кисела Вода под сомнение дека го нападнале пратеникот Зијадин Села во Собранието за време на насилствата и нередите на 27 април.

Како што соопшти МВР, кривична пријава ќе биде поднесена против И.К. (37), исто така од Скопје, кој се товари за напад врз претседателот на СДСМ и пратеник во Собранието, Зоран Заев.

Во соопшението МВР информира дека во домот на К.Ѓ. околу шест часот утрово бил извршен претрес при што се пронајдени и подигнати патики со траги слични на крв, облека и три мобилни телефони, кои му се одземени. Утврдено е дека во собраниската сала 3, каде што се одржуваше прес-конференцијата, Ц.Ѓ. најпрво фрлил стол, а К.Ѓ. фрлал разни предмети кон присутните пратеници, по што двајцата заедно физички го нападнале и го влечеле пратеникот Зијадин Села.

Според МВР, И.К. бил повикан на информативен разговор вчера попладне околу 12:30 часот поради постоење основи на сомнение за сторено кривично дело „учество во толпа што ќе спречи службено лице во вршење на службено дејство“. Тој во разговорот кажал дека откако влегол во салата каде што се одржувала прес-конференцијата, со употреба на физичка сила го нападнал Заев и фрлил стол кон вработени од обезбедувањето.

По разговорот со полициските службеници, И.К. во 16:15 часот е ослободен.

Меѓу другото, Секторот за внатрешни работи - Скопје (СВР) соопшти дека во консултација и соработка со Основното јавно обвинителство, презема мерки и активности за потврдување и документирање на дејствата.

„Исто така, СВР Скопје, во консултација и соработка со Основното јавно обвинителство Скопје, и натаму презема мерки и активности во врска со настаните од 27.04.2017 година во Собранието на Република Македонија и обезбедување на преостанатите кривично пријавени лица, идентификација и документирање и на други лица учесници во настаните, а се работи и на повикување лица на службени разговори кои досега се идентификувани како лица кои биле присутни или учесници во настаните во Собранието на Република Македонија на критичниот ден", соопштија од МВР.