Австрија: Докторка казнета бидејќи на пациент му ампутирала погрешна нога

ВИЕНА (АА) - Докторка е парично казнета бидејќи ампутирала погрешна нога на 82-годишен пациент во болница во Линц, Австрија, јавува Агенција Анадолија (АА).

Окружниот суд во Линц ја објави одлуката за постапката која е во тек против 43-годишната докторка обвинета за нанесување телесни повреди на својот пациент.

Судот соопшти дека докторката, која во мај на пациентот му ја оперирала десната наместо левата нога, е казнета со парична казна од 2.700 евра.

Таа призна дека направила голема грешка.

Судот одлучи и на вдовицата на пациентот, кој почина пред последното рочиште, да ѝ бидат исплатени 5.000 евра.

Роднините на пациентот поднеле тужба против докторката која го оперирала 82-годишниот пациент, што се лекувал поради болки во двете нозе во болницата во Линц, и наместо левата му ја ампутирала десната нога.