СКОПЈЕ (АА) - Во рамките на случувањата во Авганистан, министерот за надворешни работи на Северна Македонија, Бујар Османи, заедно со членовите на Стратешкиот совет при Министерството за надворешни работи (МНР) одржа дискусија за можните последици од кризата врз Северна Македонија, јавува Агенција Анадолија (АА).
Имено, министерот Османи, со членовите на Советот одржа состанок чија улога е дефинирање на десетгодишна стратегија за надворешната политика во рамки на процесот „Рефлекција 2030“, а тема на денешната дискусија беа актуелните геополитички процеси со акцент на Авганистан.
На дискусијата, од членовите на Стратешкиот совет (на МНР) присуствуваа и Нано Ружин, универзитетски професор и поранешен амбасадор на Северна Македонија во НАТО, Ризван Сулејмани, професор и поранешен министер за локална самоуправа во Владата, претседателот на МАТТО, Ајдован Адемовски, како и поранешниот министер за надворешни работи, Срѓан Керим, кој се обрати преку видеопроекција.
Османи истакна дека треба отворено да се разговара на оваа тема, да се кажат сите препораки и размислувања за надворешно-политичкото дејствување на Северна Македонија во периодот кој ќе следува.
„Очигледно тоа што се случува во Авганистан, меѓутоа и генерално, сите геополитички поместувања покажуваат дека непредвидливоста останува главната карактеристика на меѓународен план, а непредвидливоста носи голем број кризи“, изјави Османи.
Тој смета дека Северна Македонија, како држава треба да дефинира стратешко антиципирање за да одговори на сите предизвици, бидејќи, според него, случувањата во овој контекст се од голема важност за нејзиното исцртување на меѓународната позиција.
„Сигурно ќе кажете дека ние не сме голема и моќна држава за да влијаеме на тие текови, но ние сме една од триесетте членки на НАТО, и како што реков, следни претседавачи по Полска со ОБСЕ, и сметам дека имаме многу да придонесеме во тој дел, се разбира и превентивно да дејствуваме во рамките на регионалната, но и на националната безбедност“, додаде Османи.
Пред три дена, на Меѓународниот аеродром во Скопје пристигнаа 149 Авганистанци, меѓу кои имаше жени и деца, а беа пречекани од министерот Бујар Османи. Северна Македонија одлучи да одобри 750 барања за привремено згрижување, сѐ додека не се процесуираат документи за нивната крајната дестинација.
