Венецуела: Загинаа 14 мигранти при потонување на чамец на отворено море

АНКАРА

Четиринаесет лица загинаа, од кои 2 деца, при потонување на чамец со имигранти на отворено море во Венецуела, пренесува Агенција Анадолија (АА).

Според веста што ја објави „Би-би-си“ (BBC), потонал чамец со најмалку 20 мигранти, кои од Венецуела тргнале кон Тринидад и Тобаго.

Екипите на Крајбрежната стража на Венецуела викендов ги пронашле безживотните тела на 14 лица, од кои 2 деца, што се наоѓале на чамецот што потонал на венецуелскиот брег.

Групата мигранти што се наоѓале во чамецот, на 6 декември испловиле од местото Гирија во венецуелската држава Сукре.

Според Меѓународната организација за миграции (IOM), се претпоставува дека во последните 5 години Венецуела ја напуштиле 5,4 милиони лица бегајќи од економската и политичката криза.

Миграциите на жителите на Венецуела се истакнуваат како најголем мигрантски бран во блиската историја.

Минатата година најмалку 2 брода исчезнаа патувајќи кон Тринидад и Тобаго.