Либан: Се зголемува бројот на загинати во експлозијата во Бејрут

ИСТАНБУЛ

Бројот на загинатите во експлозијата која вчера се случи во Бејрут, во Либан, се зголеми на 113, соопшти министерот за здравство на Либан Хамад Хасан, јавува Агенција Анадолија (АА).

Додаде дека во експлозијата се повредени околу 4.000 луѓе, а десетици се исчезнати.

Пожарот во складиштето со оружје во пристаништето Бејрут предизвика силна експлозија вчера, а како последица на детонацијата предизвикана е значителна штета на многу објекти и возила.

Претседателот на Либан Мишел Аун, смета дека амонијак-нитрат е причина на експлозијата што доведе до рушење на трикатна зграда, а експлозијата се слушна во многу делови од градот.

Врховниот совет за одбрана на Либан, го прогласи Бејрут за град погоден од катастрофа, а воведена е вонредна состојба во градот во траење од две недели.

Вчерашната експлозија ја продлабочи тешката состојба во земјата, која веќе со месеци се соочува со економска криза и политичка поларизација.