Премиерот на Федерацијата на БиХ, Никшиќ: За жал, има човечки жртви во поплавите

САРАЕВО (АА) - Премиерот на босанскохерцеговскиот ентитет на Федерацијата Босна и Херцеговина, Нермин Никшиќ, зборуваше за поплавите и големото невреме што синоќа зафати делови од ФБиХ и потврди дека има и човечки жртви, пренесува Анадолу.

„Поради обилните врнежи во текот на ноќта на повеќе места во областите Јабланица, Коњиц, Кисељак, Крешево и Фојница има поплави и одрони. Од синоќа сум во комуникација со екипите на терен и ја координираме акцијата за помош и покрај сите комуникациски тешкотии поради оштетените мрежи. Ситуацијата е многу сериозна бидејќи голем број граѓани сѐ уште се заробени во куќите бараме начин да стигнеме до нив. За жал, имаше и човечки жртви, но сѐ уште ги немаме сите информации за тоа. Јавноста ќе ја информираме за сѐ штом ќе добиеме потврда од терен“, рече Никшиќ и додаде:

„Од раните утрински часови мобилизирани се сите надлежни и интервентни екипи. Успешно е евакуиран одреден број граѓани заробени во домовите поради водата, а и екипите остануваат во погодените подрачја за да ги спасат луѓето и да им помогнат. Очекуваме дополнителна помош во текот на денот. Во акцијата се вклучени и Министерството за внатрешни работи, со чиј хеликоптер ќе се евакуира повреденото дете.
Сега е најважно да се евакуира загрозеното население и да се спречи настанување на дополнителни штети.“

Според непотврдени информации, засега има пет жртви во невремето во Јабланица, изјави Мајда Ковач, портпаролка на Федералната управа за цивилна заштита (ФУЦЗ), за Анадолу.

Обилните врнежи во текот на ноќта предизвикаа поплави и одрони на подрачјето на Јабланица, Коњиц, Кисељак, Крешево и Фојница.

Автомото клубот на Босна и Херцеговина (БИХАМК) соопшти дека сообраќајот на магистралниот пат Јабланица - Мостар и на патните правци Јабланица, Прозор-Рама - Блидиње, Бусовача - Кисељак и Кисељак - Крешево е во прекин поради одрони, камења и порои.