Yusuf Özcan
18 Октомври 2021•Ажурирај: 19 Октомври 2021
ПАРИЗ
Францускиот историчар Жан-Пјер Филиу, истакнувајќи дека францускиот претседател Емануел Макрон е премногу фокусиран на претседателот Реџеп Таип Ердоган, рече дека најсериозните закани за француското влијание во Магреб доаѓаат претежно од Русија и Обединетите Арапски Емирати (ОАЕ), пренесува Агенција Анадолија (АА).
Весникот „Ле Монд“ ја објави статијата на експертот за Блискиот Исток, Филиу, насловена како „Чудната опсесија на Франција кон Турција во Магреб“.
„Претседателот Макрон во неговите изјави за Магреб ја напаѓа само Турција. Меѓутоа, Русија и ОАЕ се обидуваат да го поткопаат француското влијание во Магреб“, рече Филиу потсетувајќи на изјавите на Макрон за Алжир и Турција.
Филиу истакна дека е „легитимно“ Макрон да биде загрижен за оцрнувачките кампањи против Франција „инспирирани од претседателот Реџеп Таип Ердоган“, особено за време на дебатата во октомври 2020 година во врска со карикатурите на пророкот Мухамед.
Наведувајќи дека посетата на алжирскиот претседател Абдулмеџид Тебун на Анкара ќе го достигне врвот во односите меѓу Алжир и Турција, Филиу рече: „Со премногу фокусирање на Ердоган, Макрон заборава дека најсериозните закани за француското влијание во Магреб доаѓаат претежно од Русија и ОАЕ. Неуспешноста на францускиот претседател во Магреб произлегува од неговата погрешна политика во Либија во текот на првите три години од неговиот мандат.“
Филиу истакна дека поддршката на Макрон за Калифа Хафтар, водачот на нелегитимните сили во источна Либија, предизвикала продолжување на „Граѓанската војна“ во земјата во 2019 година и ја поткопала работата за посредување на Обединетите нации (ОН).
Истакнувајќи дека Франција „тајно“ застанала на страната на Русија, ОАЕ, Египет и Саудиска Арабија, Филиу рече: „Нападот на Хафтар резултираше со тоа што Владата на Триполи беше префрлена во прегратките на Турција. Интервенцијата на Турција ја смени воената ситуација и ги растера руските „платеници“ кои учествуваа во војната.“
Во овој контекст, Филиу рече дека Франција ги гледа целите на Русија кон Магреб со „толеранција“, додека целите на Турција ги оценува како „непријателски“.
Наведувајќи дека првиот воен партнер на Алжир е Москва, Филиу рече: „Парадоксално е да се слушне како францускиот претседател го осудува антифранцускиот политичко-воен систем во Алжир, без да се спомене Русија. Молкот (за алжирско-руското воено партнерство) е уште повознемирувачки, откако Макрон не се двоумеше да ги испокара службениците на Мали, кои сакаа да донесат ‘руски платеници‘ во земјата.“
Филиу истакна дека Макрон отворено ја изразил својата блискост, дури и „партнерство“ со престолонаследникот на Обединетите Арапски Емирати (ОАЕ), Мухамед бин Зајед ал Нахјан.
Наведувајќи дека резервите на Франција кон Абу Даби исчезнале откако ОАЕ го потпишаа „мировниот договор“ со Израел во септември 2020 година, Филиу рече: „Сепак се заборава дека самиот Мухамед бин Зајед има отворени односи со очигледните непријатели на Франција, особено со Чеченецот Кадиров.“
Филиу посочи дека Нахјан се „одмаздува“ за поразот на Хафтар во Либија со саботирање на „демократското искуство“ во Тунис.
Тврдејќи дека Обединетите Арапски Емирати и Египет одиграле важна улога во одлуката на претседателот на Тунис, Кејс Саид, да го „суспендира уставниот процес“ во неговата земја, Филиу рече дека и ОАЕ придонесуваат за ескалација на тензиите меѓу Алжир и Мароко.
- Изјавите на Макрон за Алжир и Турција
„Градењето на Алжир како нација е феномен што вреди да се гледа. Дали постоеше алжирска нација пред француската колонизација? Тоа е прашањето“, изјави денеска Макрон за време на состанокот во Елисејската палата со потомците на Алжирците кои се бореа на страната на Франција за време на Војната за независност на Алжир.
Реагирајќи на „повторното запишување на официјалната историја што не се заснова на факти“ во врска со колонијалните активности на Франција во Алжир, Макрон тврди дека оваа историографија се базира на „дискурс на омраза кон Франција“.
