لە ساڵی ٢٠١٤ەوە تا ئێستا بۆ یەکەم جار نرخی بەرمیلێک نەوت گەیشتە ٩٠ دۆلار

واشنتۆن- AA

لەگەڵ زیادبوونی گرژییەکانی نێوان رووسیا و ئۆکراینا، نرخی بەرمیلێک نەوتی خاوی برێنت لە ساڵی ٢٠١٤ەوە بۆ یەکەم جار گەیشتە ٩٠ دۆلار.

لەپاڵ بەردەوامی زیادبوونی خواست لەسەر نەوت لە جیهاندا، زیادبوونی نیگەرانییەکان لە کێشەی نێوان رووسیا-ئۆکراینا، بووە هۆی بەرزبوونەوەی نرخی نەوت.

نرخی خاوی برێنت بە رێژەی لەسەدا دوو زیادی کرد و لە ساڵی ٢٠١٤ەوە تا ئێستا بۆ یەکەم جار گەیشتە ٩٠ دۆلار.

هەروەها نرخی بەرمیلێک نەوتی رۆژئاوای تەکساس بە رێژەی لەسەدا دوو زیادی کرد و گەیشتە ٨٧ دۆلار و ٤٥ سەنت.

جێی ئاماژەیە زیادبوونی گرژییەکانی نێوان رووسیا و ئۆکراینا، هۆکارێکی سەرەکین بۆ زیادبوونی نرخی نەوت، پێشتریش سەرۆکی ئەمریکا، جۆ بایدن ئەوەی ئاشکرا کردبوو کە لە ئەگەری داگیرکردنی ئۆکراینادا، ئەگەر هەیە سزا بخاتە سەر سەرۆکی رووسیا، ڤلادیمیر پوتین.