ئێران...١١٢ توشبووی دیکەی کۆرۆنا گیانیان لەدەستدا

ئه‌نقه‌ره‌ - AA

لە ئێران لە میانی ٢٤ کاتژمێری رابردوودا، ١١٢ کەسی دیکە بەهۆی ڤایرۆسی کۆرۆنای نوێ (COVID-19) گیانیان لەدەستداوە، بەمەیش كۆى گشتى حاڵەتەكانى گیانلەدەستدان بەهۆی ڤایرۆسەکەوە بۆ ٢١ هەزار و ٢٤٩ كەس بەرزبوويەوە.

گوتەبێژی وەزارەتی تەندروستیی ئێران، سیما سادات لاری له‌ ته‌له‌ڤیزیۆنی فه‌رمیی وڵاته‌كه‌ی، دوایین زانیارییه‌كانی له‌باره‌ی په‌تای ڤایرۆسی كۆرۆنا، بڵاوكرده‌وه‌.

سیما سادات لاری لەبارەی دوایین ئامارەکانی ڤایرۆسی کۆرۆنای نوێ ئاشكرای كرد کە لە میانی ٢٤ کاتژمێری رابردوودا، ١١٢ توشبووی کۆرۆنا گیانیان لەدەستداوە و دوو هەزار و ١١٥ حاڵەتی نوێی تووشبوون به‌ ڤایرۆسه‌كه‌ تۆمارکراوە.

گوتەبێژی وەزارەتی تەندروستیی ئێران گوتیشی: "بەمشێوەیە ژمارەی ئەو کەسانەی تا ئێستا بەهۆی ڤایرۆسی کۆرۆنای نوێوە گیانیان لەدەستداوە گەیشتووەتە، ٢١ هەزار و ٢٤٩ کەس و ژمارەی حاڵەتە تۆمارکراوەکانیش گەیشتووەتە، ٣٦٩ هەزار و ٩١١ کەس".

سیما سادات لاری ئاماژەى بەوەیش كرد كە سێ هەزار و ٨١١ تووشبوو لە يەكەى چاودێرى چڕدا چارەسەر وەردەگرن و تا ئێستا، ٣١٨ هەزار و ٢٧٠ تووشبووی دیکەی ڤایرۆسەکە دوای وەرگرتنی چارەسەر چاکبوونەتەوە و نەخۆشخانەیان بەجێهێشتووە.

گوتەبێژی وەزارەتی تەندروستیی ئێران ئاشكراشی كرد تا ئێستا، سێ ملیۆن و ١٦١ هەزار و ٨٩٤ پشکنینی تایبەت بە ڤایرۆسەکە ئەنجامدراوە.

یه‌كه‌م حاڵه‌تی تووشبوون به‌ ڤایرۆسی كۆرۆنای نوێ له‌ ئێران رۆژی ١٩ی شوباتی رابردوو له‌ شاری قوم ده‌ست نیشان كرابوو.