سلێمانی .. گفتوگۆکردن لەبارەی ھەمواری یاسای وەبەرھێنان

سلێمانی ـ AA

ئەمڕۆ لە شاری سلێمانی گفتوگۆیەکی کراوەی تایبەت بە ھەمواری یاسای وەبەرھێنان لە ھەرێمی کوردستان لە لایەن یەکێتیی وەبەرھێنەرانی کوردستان – لقی سلێمانی رێکخرا، تێیدا ژمارەیەک لە پەرلەمانتارانی کوردستان و دەزگا حکوومییە پەیوەندیدارەکان و مامۆستایانی زانکۆ و کەرتی تایبەت و یاساناسان و پسپۆڕانی ئابووری ئامادەی بوون.

لە گفتوگۆی بەشداربوواندا جەخت کرایەوە لەپێویستی ھەموارکردنەوەی یاسای وەبەرھێنان بەشێوەیەک کە ڕەنگدانەوەی تەواوی ھەبێت بەسەر ھەموو سێکتەرەکاندا و لە بەرژەوەندی ھەمووان بێت.

گوتەبێژی یەکێتی وەبەرھێنەرانی کوردستان، یاسین مەحمود جەختی لەسەر پێویستی ھەموار کردنەوەی یاسای وەبەرھێنان کرد و ئاماژەی کرد بەوەی یاساکە چەندین کەموکوڕی تێدایە.

یاسین مەحمود بۆ بەشدار بووانی گفتوگۆکە دواو گوتی: "جێگای داخە کە بەبەھای ١٥ ملیار دۆلار لە ھەرێمی کوردستان مۆڵەتی وەبەرھێنان دراوە، بەڵام ئەو مۆڵەتانە تەنھا حبری سەر کاغەزن و نەچوونەتە بواری جێبەجێکردنەوە، بۆیە دەبێت یاسای وەبەرھێنان ھەموار بکەینەوە تاوەکو ھۆکاری کێشەکانی وەبەرھێنان بزانین و کەموکوڕییەکان چارەسەر بکەین".

ئەو گوتی: "ئەمڕۆ ھەقی خۆمانە ھەڵوەستە بکەین لەسەر ئەو کەموکوڕییانەی لە پڕۆژەکانی وەبەرھێنان ھەمان بووە، ھۆکارەکەشی ئەوەیە لەکاتی دانانی یاسایی وەبەرھێناندا بەھۆی پەلەکردن لە دانانی یاساکە ئەوەمان نەچەسپاند کە کێ سەرپەرشتی پڕۆژەکانی وەبەرھێنان دەکات کە دەیان کەموکوڕی گەورەیان تێدایە".

ئاماژەی بەوەش کرد، ئەمڕۆ لەکاتێکدا یاسای وەبەرھێنان ھەموار دەکەنەوە کە تەنھا لەسەدا ١٦ توانیویانە وەبەرھێنانی دەرەکی بھێننە ھەرێمی کوردستانەوە، بەشێکی ئەو وەبەرھێنەرە بیانیانەش وەک ھاوبەشی وەبەرھێنەرانی ھەرێم ھاتوون و پڕۆژەکانیان ئەنجامداوە.

گوتەبێژی یەکێتی وەبەرھێنەرانی کوردستان باسی لەوەشکرد، ماوەی چواردە ساڵە کار بە ئەم یاسایە دەکرێت، بەڵام ئێستا دۆخەکە گۆڕاوە و پێویستی بەھەموارکردنەوەیە، بەجۆرێک لەگەڵ دۆخی ئێستادا بگونجێت.

لەلای خۆیەوە ئەندامی پەرلەمانی کوردستان، شێرکۆ جەودەت گوتی: "پێویستە وەبەرھێنان لەسەر نەخشەی وەبەرھێنان بکرێت، واتە ھەر ناوچەیەک بۆ کۆمەڵێک پڕۆژەی پەیوەست بەیەکەوە بێت، نەوەک ئەوەی کە ھۆتێل لەسەر کێڵگەی نەوت دروستکراوە، یان پڕۆژە لەسەر ناوچەیەک دروستکراوە کە یۆرانیۆمی تێدابووە".

بەڕێوەبەری فەرمانگەی وەبەرھێنانی سلێمانی، عەزیز سەعید کە لە گفتوگۆکەدا ئامادە بوو رایگەیاند لە ساڵی ٢٠١٩ دا تەنھا ١٧٩ داواکارییان بۆ ئەنجامدانی پڕۆژەی وەبەرھێنانیان بۆ ھاتووە، لەو ژمارەیەش تەنھا ١٥ پڕۆژە مۆڵەتی وەرگرتووە.