داعش دووبارە پەلاماری سەنگەرەکانی پێشمەرگەی دا

هەولێر - AA

وەزارەتی پێشمەرگەی هەرێمی کوردستان رایگەیاند، شەوی رابردوو تیرۆریستانی داعش لە سنووری میحوەری پردێ - دبس، پەلاماری سەنگەرەکانی پێشمەرگەیان داوە.

بەپێی راگەیەندراوێکی وەزارەتی پێشمەرگە، کاتژمێر ١٠:٣٠ی شەوی رابردوو لە سنووری میحوەری پردێ - دبس چەکدارانی رێکخراوی تیرۆریستیی داعش، پەلاماری خاڵێکی فەوجی۲ی لیوای۱۰ی پیادەیان داوە.

لە راگەیەندراوەکەی وەزارەتی پێشمەرگەدا هاتووە "پێشمەرگە ئازاکانمان بەخێرایی لێیان هاتنە دەست و راویان نان، خۆشبەختانە هیچ زیانێک بە پێشمەرگە نەگەیشتووە".

هەروەها رایگەیاندووە "ئەمە بۆ چەندین جارە داعش بۆشایی نێوان هێزی پێشمەرگە و سوپای عێراقی دەقۆزێتەوە بۆ پەلاماردانی هێزەکانی پێشمەرگە".

هەفتەی رابردوو لە پەلامارێکی چەکدارانی داعش بۆسەر سەنگەرەکانی پێشمەرگە لە هەمان میحوەر، دوو پێشمەرگە شەهیدبوون.